Жикгимонт, божою м-стию король и великий князь. Чиним знаменито сим нашим листом о то. Бил нам чолом гетман наш ст. л. брясл. и в. м. волынское з. кн. Костянтин Ив. Остросский о том, што есмо дали ему манастырь в луцком повете на имя Жидичин до его живота, который же манастыр здавна нашо господарское поданье, ино бил нам чолом князь Костянтин, абыхмо позволили ему втом манастыри с того николы в Жидичине общину встановити и ряд справити подлуг их закону греческого. и мы для его службы к нам верное и николи невмешканое на его чоломбите то есмо вчинили; позволили есмо его милости в том манастыри стого Николы в Жидичине общину встановити и ряд справити манастырский и зрядити. подлуг их закону греческого, как наилучшей розумеет (?). и тот манастыр жидичин даем и дали есмо ему в моц и в опекане до его живота, а по его животе мает тот манастыр за ся приити в наши руки и в подане. а што ся дотычеть выбираня игумена к тому манастырю, мають князи и панове и земяне волынское земли посполу с старци того манастыря, выбравши которого человека доброго а к тому годного, к нам его прислати, а мы маем тот манастыр Жидичин ему дати, а от того манастыря тот игумен чоломбитя мает нам дати пиестьдесят золотых. и тая община и зряжене в том манастыри, которуюж встав и ряд справит князь костянтин мает быти навеки вечный непорушно, и то потвержаем сим нашим листом вечно, а на твердость того и печать нашу казали есмо привесити к сему нашему листу, а при том были панове рада наша: воевода виленский канцлер наш пан Миколай Николаевич Радивилович, воевода троцкий, маршалок наш дворный пан Григорей Станиславович остиковича, пан троцкий, староста жомойский пан Станислав Янович, воевода полоцки пан Станислав Глебович, староста городенский пан Станислав Петрович и иншые панове рада наша, писан в брести лета божьего тисяча пятьсот первогонадесят м-ца июля 22 день, индикт 14.

Лит. метр., кн. зап. IX, 45. С непунктированной копии с подлинной грамоты.