Глаголаше же и се блаженый отець наш, яко: «Может и едина милостыни спасти чловека, аще законно живет. Слышах некоего чловека, яко до скончаниа живота творяше милостыню, и, скончавшуся ему, якоже некоему откровено бысть о нем, приведен бысть к реце огненей, а на другой стране реки — место злачно, и светло зело, и различным садовием украшено[383]. Не могущу же ему преити в чюдное то место страшныя ради реки, и се внезапу приидоша нищих множество, и пред ногами его начата ся класти по ряду, и сотвориша яко мост чрез страшную ону реку — он же преиде по них в чюдное то место».

Можаше бо Бог и без моста превести реку ону. Пишет бо о Лазаре: несен бысть //

л. 34 об. ангелы на лоно Авраамле, аще и пропасть велика бе промежу праведных и грешных, и не потребова мосту на прешествие; но нашая ради пользы таковым образом показа осужение грешных и спасение праведнаго, яко да увемы, чесо ради осужени быша, такоже яви, чесо ради праведный спасен бысть.

Подобно тому и в Беседах Григориа Двоесловца писано: чрез реку огненую мост[384], а на нем искус, грешныи же в том искусе удержани бываху от бесов и во огненую реку пометаеми; а на той стране реки тако же место чюдно и всякими добротами украшено. Праведнии же не удержани бывають тем искусом, но со многим дерзновением преходят в чюдное то место. И ино мно//га

л. 35 там писано о праведных и о грешных, по человеческому обычаю показаемо.