Wel may I pleyne on yow, lady moneye,

þat in the prison of your sharp scantnesse

Souffren me bathe in wo and heuynesse

And deynen nat of socour me pourueye.

Whan þat I baar of your prison the keye

Kepte I yow streite? Nay, God to witnesse,

Wel may I pleyne, etc.

I leet yow out. O, now of your noblesse

Seeth vnto me, in your deffaute I deye.

Wel may I pleyne, etc.

Yee saillen al to fer. Retourne, I preye,

Conforteth me ageyn this Christemesse.

Elles I moot in right a feynt gladnesse

Synge of yow thus and yow accuse and seye,

Wel may I pleyne, etc.