Степень седмыи и два митрополиты: Кирил, Иосиф, и грань седмая, в нем же глав 16

<…>

Глава 4. О великом князе Георгии Всеволодичи. Победа на блъгары, и о бывшеи скръби в Руси, и яко не токмо милость от Бога мерится, но и гнев по мере за грехи наводит Бог

По великом князе Констянтине, сыне Всеволожи Георгиевичи Длъгорукаго, паки Владимирьскую дръжаву приат брат его, сии великии князь Георгии, юже преже вручи ему отець его Всеволод. Тогда же блъгары влъжьскиа и камьскиа неправдоваху ему и град Устюг лестию взяша. И сего ради великии князь Георгии посла на них брата своего Светослава. И Богу поспешествующю ему, с множеством воиньства своего взя многыя их грады и веси, и вся области их попленишя, и многое воиньство их победишя, и плену бесчислено взяшя, и приидошя здрави въсвояи.

<…>

Глава 9. О гневе Божии и о нахожении безбожнаго Батыя на Русьскую землю

Егда же не исправихомся и непотребни быхом, зависти же и гордости и неправды не лишихомся, и дръжавнии наши аще и благочестиви бяху, но обаче друг пред другом честь и начальство получити желаше, и един единаго от отеческаго достояниа изганяше, и кождо самочинне тщашеся самодръжьство въсхитити, и сам стареишиньствовати хотяше Русьским царствием, и брат на брата иноплеменныя языки поганых варвар наводяше, понеже самовльне не могохом отвратитися от злоб сих, и того ради усугубляше Бог праведныи гнев Свои и попусти на ны тяжчаишая напасти.

Великое пленение. И яко бичем от вервии не наказахомся, и того ради пророческое слово на нас исполнися, яко же рече: «Палицею железною упасеши их» (ср. Пс. 2: 9). И тако жестоким пленением в запустение предаде тогда многыя грады и места Русьскаго царствиа, и таковым тяжчаишим наказанием прочее преблагыи Бог, хотя конечнаго запустениа свободити нас, тогда же мучителнеишаго варвара, кровояднаго царя Батыя, от въсточныя страны наведе на Русьскую землю, прьвие на Рязань, потом же на Коломну, и на Москву, и на Владимирь, и на иныя многиа грады, с многою злобою вся испровращая, яко же лютыи некии зверь вся поядая, останки же ноготми растерзая. Его же лютостию храбреиших русьских сынов многих мечь пояде, овии же плещи вдаша сопротивным. Скипетродръжатели же овы оружием падоша, овы же в чюжих кралевъствах укланяхуся гостяще, всякиа помощи отпадше. Ратникъ же грады разоряа, и гражаны овы в плен поплени, овы же оружию ядь полагая, и корысть многу стяжа, княжьска имениа изообрет. Велико зло от него сътворися множеству русьскаго языка. Матери обезчядствовашяся, и сосци их млечнии источники уставишя, вместо же тех сле

зныя струя от очи низвожахуся, видяще младенца своя на земли поврьжена и мягкая их удеса коньскими ногами стираеми. И кто может словом сказати болезни их утробныя и ины неисчетныя напасти? Чрьтожница повлачимы и всюду обводимы, девы растлеваемы, синклитьскиа жены, иже никогда же рукама своима работному делу касахуся, но рабом своим повелеваху преже, последи же сами повелеваеми варварьскими женами, работну игу выю прекланяюще, пристояху жерновам и горньцу руце придръжащи, огня възжигающи, с черпалом рыщюще, источники обходящи и воду носящи, трапезе предстоящи и храмину пометающи. Иногда бышя гръды, тогда же работою склячени, смиришяся. Иже иногда златыми монисты и свиляными одеждами красящеся, тогда же рубищи раздранны облъчены, боси же и алчны присно. Священныя девы нудими и обругаеми, мужие жен разлучаеми, чяда родителю лишаеми, юноша в плен ведоми, юныя же и старцы мечи пронзаеми, храбрыя же и князи оружием падающе, священници же в жрътвеницех закалаеми. Земля Русьская очервленися кровию, реками лиющися от телес, воды смешаеми с кровию. Умилен позор весь странно видети: мужие, яко снопие в день жатвы, поврьжены, телеса раздроблены смесишяся священных мужь и девиць, и не бе кто погребая их. Враном же и псом пища паче предлагаема. Воплеве в градех, рыданиа на улицах, плачеве в домех! Повсюду стонание, страх на распутиах! Вси ужасошяся и изнемогошя, ниже бегъством свое спасение кто можаше умыслити, истаявше печалми, яко сетию полячены. Всюду беды, яже ни слово может представити. Тогда же мнози мученическими венци от Бога увязошяся.

<…>

Глава 10. Плачь и страдание великаго князя Георгиа Всеволодича и прочих с ним

Великии же князьГеоргии Всеволодичь стояше с полки своими на реце на Сити, и ту прииде к нему вестник, яко же древле праведному Иову, поведая ему, яко град Владимирь взяша татарове: «Епископ же Митрофан, и великая твоя княгини с дщерию твоею, и съ снохами, и с внучаты, и прочая княгини, и множество бояр и людеи в соборнои церкви огнем скончашяся. Мнози же от них в то время иноческии образ въсприаша от епископа. Сына же твоего Владимира в граде Москве взяшя погани и по многом истомлении у града Владимиря показавше, и смръти предашя его. Воевода же Филипп на Москве за веру Христову мучением скончася. Два же стареишая твоя сына Всеволод и Мстислав в новом граде Владимири от тех же безбожных татар убиена быста, инии же людие мнози избиени бышя. Оставшии же людие к тебе грядут». Самодръжец же и прочии с ним, слышавше сиа, и въскричашя с плачем велиим о церковном разорении, о епископе же и о многом кровопролитии христианьском, бяше бо милостив. И въсхлипая из глубины сердца, моляся и вопиа, сице глаголаше:

Молитва. «О Владыко Господи Боже Вседръжителю! Сице ли угодно Твоему человеколюбию, яко врази наши многи грады разоришя, и попраша многи церковныя домы святыня Твоея, и множеству людем Твоим тогда злобну пагубу съдеяшя? И аз, подобно Иову, лишен бых не токмо супруга и чяд, но и множества Тобою дарованныя ми дръжавы. И не вем, что сътворити, понеже бес числа съгрешихом, и Ты прогневася и зело смирил ны еси. Яко праведен еси, Господи, и праведным судом Твоим множество пролитиа неповинныя крови раб Твоих многи новыя ныне мученики к Себе привел еси. И почто един аз остах смирен и посрамлен? Но, о премилостивыи Господи, Господи! Не остави милости Твоея от нас и мене, грешнаго и недостоинаго раба Твоего, сподоби пострадати с христоименитыми сими людми Твоими истинныя ради веры имени Твоего Святаго, Отца и Сына и Святаго Духа. И причти мене наследию вечных Твоих благ с новыми сими Твоими мученики, и о всех сих да будет воля Твоя святая, яко благословен еси в веки. Аминь».

И тако ему в велицеи печали молящюся, и по малу нача укреплятися, и всю печаль свою възверже на Бога. И абие с всеми плъки своими уготовися к сопостатным на брань. Погании же скоро приближишяся, и съступишяся плъци, и бысть брань велика, и сеча зла, и кровь многа яко вода пролиася. Богу же попустившю, побежени бышя русьстии князи и боляре и все воиньство от поганых татар, идеже великии князь Георгии венчася кровию, ею же взыде къ Христу, от Него же и мученическии венець приат, его же желаше, месяца февраля в 4 день.

Глава 11. О обретении телеси великого князя Георгиа, последи же и главу его обретошя

Егда же инамо уклонишяся погании татарове, и тогда блаженныи Кирил, епископ Ростовьскии, идыи з Белаезера, тамо бо избыв варварьского сверепьства, и прииде на место, идеже добропобедныи великии князь Георгии святую свою кровь пролиа от безбожных татар, подвизаяся по отеческом достоянии, и ту обрете честное тело его. Его же с многими слезами благоговеино взем и принесе в Ростов, и пев над ним обычная пениа съ всем освященным собором и с прочим причтом, плачю же велику бывшю от людеи всех, и положишя его в церкви Пресвятыя Богородица в Ростове. Главы же его не обрете тогда епископ въ множестве трупиа мртъвых, последи же обретошя и святую его главу, и принесошя в Ростов, и положиша ю в гроб к честному телеси его.

Глава 12. О пренесении честных его мощеи великаго князя Георгиа из Ростова въ Владимирь

Егда же брат его богохранимыи великии князь Ярослав Всеволодичь прииде из Новаграда в град Владимирь и очисти святыя церкви от трупиа мрътвых, оставшая же люди събрав, утеши. Потом же посла в Ростов и повеле принести въ Владимирь честное и страстотрьпческое тело святаго брата своего великаго князя Георгиа, его же вземше, с многою честию понесошя. И егда бысть близ града Владимиря, и срете его сам великии князь Ярослав с епископом Кирилом, и съ всем священным събором, и с детми своими, и с боляры, и с всенародным множеством гражан и окрестных с умилением и съ слезами и с рыданием, и положишя его в соборнеи церкви Пресвятыя Богородици в приделе южном с песньми надгробными. Всем же зрящим видети есть чюдо преславно и удивлению достоино, яко святая глава его тако съвокупно прилпе к честному телеси его, яко ни следа видети отсечениа на выи его, но вся съставы целы и неразлучны, иже и доныне тако в гробе бяху пребывающе, от всех людеи видимы и удивляеми и достоино почитаеми. Еще же и рука его десная выспрь бяше въздеяна видети, ею же, яко жив, показуя подвиг своего съврьшениа, яко въсприат от Бога вместо земнаго царствиа небесных и вечных благ наслажение вкупе с царственым си сопругом, и с трема благороднеишими сынъми, и с единою дщерию.

(Печатается по: Степенная книга царского родословия по древнейшим спискам. Т. 1: Житие св. княгини Ольги. Степени I–X / Подг. под рук. Н. Н. Покровского. М., 2007. С. 492, 496–501.)