Буживца биллира бейкквалли ца уршира гьелела абара. Ца бари аба рик1улца уршилци: — Вя-ква, абала виккан, г1янццай, дярг1ив шинна гажин какъкъара. Тажин шинни биц1ивкъел, г1янццала мягьла улмагьартатти, хъяч1ли хъил кя.
Гьагурца урши шиней. Биц1ивца гажин шинел. Аммаки г1янццала мягьла улгьатурца. Гьелин буживца ца берхъив гьинцала ккалкка. Ккалкканцци гьарурч1ивли, ца рихънара руживца. Гьел рихънала сипатццир, аждагьа аттаба руживца.
Урши чиваживли, илел далай гьебелч1унца: — П1иллиривкква, п1иллирив! Пяжав музи гьинци дикьал. Гья гьежин, эттира лукканда. Аттабай деххала хъар буцарара кумекбиритти.
Абал бурсибил хъумэртурли, урши кабишивли г1янццала кьассей гажинра цайра, гьагурца ккалккангу.
Карурч1ивца ккалкканццир аждагьа аттабара. Деххала хъар буцив урши гьелел хапваривли, вижкаривца деххала вакни.
Ч1ягьик1улца урши, дехханттак1ин, амма плела т1амбикьан чара вейкку.
Укъкъивли, аждагьа аттабал, цинна хъил, вижкаривли хвала г1яшаккан, чибижихивли ц1ара, цари регурца царара урцул цакъара дуццан. Цинна рирсилцци рик1улца, гьеж г1яшакнела кьари карижи. Бурта чермагьурсатти. Мякьир лякьмариркатти, ду церегьарей.
Ца заманалла, г1яшакнела дакни шин дуц1ардиргьвара кадиживца. Уршилли барижил абаргьул, гьебелч1унца аждагьа аттабала лайла: — П1иллиривкква, п1иллирив!
— Агь, ччакква далай бикьал, белч1акква сахъцара, — рик1улца аждагьа аттабала рирси.
Урши ик1улца: — Цаник1ва г1яшакнелла бурта хъусбегъаттал булч1анда.
Рирсилли хъусбегъивца г1яшакнела бурта цаник1ва.
— П1иллиривкква, п1иллирив! — гьебелч1унца уршилли чвакква т1амалццир ц1илра.
— Агьагьай, ччакква далай бикьал, белч1акква сахъцара, — рик1улца аждагьа аттабала рирси ц1илра.
— Цаник1ва г1яшакнелла бурта хъусбегъаттал булч1анда, — ик1улца ц1илра урши.
Рирсилли хъусбегъивца г1яшакнела бурта цаник1ва царара.
— П1иллиривкква, гИиллирив! — гьебелч1унца уршилли ц1илра.
— Агьагьай, ччакква далай бикьал, белч1акква сахъцара, — рик1улца аждагьа аттабала рирси ц1илра.
— Цаник1вацарара г1яшакнелла бурта хъусбегъаттал булч1анда, — ик1улца ц1илра урши.
Рирсилли хъусбегъивца г1яшакнела бурта цаг1ях1ли царара.
Гьел заманалла тях1ттурагьиживца г1яшакнеццир урши, рижкараривца аждагьа аттабала рирси г1яшакнецци цинна мусна, бурта чикабишивли чевчи, девгабаривца. Цай бигьвалли, аждагьа аттабала хъалжи диг1янвиживца. Релхьунца гьелин рурччан шинецци аждагьа аттабала рирси.
Церегьивца аждагьа аттаба. Гьадикьунни царара урцулра, ца г1ях1ли бицци хурег биранда рик1ул кариживца гьелин. Гьебелч1унца цинна далайра: — П1иллиривкква, п1иллирив!
Гьел заманалла уршиллира, аждагьа аттабала рирсилла т1амалццир гьебелч1унца: — П1иллиривкква, п1иллирив!
Цинна рирси арарччивли, аждагьа аттабал ц1илра гьебелч1унца:
— П1иллиривкква, п1иллирив! — Квандей абала рирси? — рик1улца ил.
Уршилли, аждагьа аттабала рирсилла т1амалццир ц1илра гьебелч1унца: — ГИиллиривкква, п1иллирив! Ила ирчила к1улт1ан рида, — ик1улца.
Къяжагьивца аждагьа аттабал цинна ирчила к1улт1а. Улбеталли, рейккура илин рирси. Муццарахьара кариживца ил рирсилжи. Ц1илра гьебелч1унца: — ГИиллиривкква, п1иллирив! Квандей абала рирси?
Уршилли, аждагьа аттабала рирсилла т1амалццир ц1илра гьебелч1унца: — ГИиллиривкква, гИиллирив! Ила ттатта т1уппула к1улт1ан рида, — ик1улца.
Къяжагьивца аждагьа аттабал цинна ттатта т1уппула к1улт1а. Улбеталли, рейккура илин рирси.
Ц1илра гьебелч1унца: — ГИиллиривкква, п!иллирив! Квандей абала рирси?
Уршилли, аждагьа аттабала рирсилла т1амалццир ц1илра гьебелч1унца: — ГИиллиривкква, гИиллирив! Ила к1улт!ан рида.
Къяжагьивца аждагьа аттабал цинна к1улт1ара. Каричивли царира ревч1ивца гьелин.
Гьелккар ттуравичивца урши. Дуц1ик1ул г1янццай кегьивца, хапбаривли шинела гажинра цайра хъил кагурца.
Бурсивца уршилли циней агу рил абацци. Ц1ил ик1улца: — Наллатин, аба, этти ник1на вирццанда. Ил бурсибил акквал абиранда. Гьанара ник1на авиццурилжи пашманвигьявда.
Гьетин гьеттира белди, дура гьежин цегьивда.