Дуживца диллира дейкквал ч1вел уртахъ: сикала дярх1яра, ттужула дярх1яра. Ца заманалла ивхьнелла илтти ч1велра шеттир дихъанцци, барчивца гвазила т1вахьа. Сикала дярх1я, ц1акьли г1якьлучебилла гьердаривли, бик1улца: — Гьана меберквабай нихьхьвал гьеж гваза. Эвла марка кадахьанхъел, ц1идехь адач1ивли делли, гьеткъел цанцилли буканда. Гьана диг1янбихьабай.

Ттужула дярх1я гьелей разибичивца. Ч1уллелли бухъивли, гвазила т1вахьа диг1янбишивца.

Бегурца ца г1ях1ли замана. Дач1ивца эв. Ца бари сикала дярх1я ккушбяхъивца. Илей гваза гьанцабичивца. Ттужула дярх1ялцци бик1улца:-Дила г1яжал ник1ва рирси раривца, бянда, гьари ду, гьел чирагара. Цаби бигьалли, дуц1бижив бегурца гвазила т1вахьва билцци. Пячбаривли хъар, лямц1ттурагьабаривца чевттар. Черцабигьявкъел, ттужула дярх1ял хабаргьассивца илеци: — Ча гьадишшибай ила г1яжала рирсилжи?

— Четтик1ай гьадишив!

— Чвакка зу цав, ччваккати!

Ч1велибил барира сикала дярх1я ккушбяхъивца. Гваза гьанбичивца. Ц1илра бик1улца ттужула дярх1ялци: — Дила цацара г1яжал рирси раривца. Бянда гьелтти чибагара. Дуц1бижив бярунни, гваза дагна кебегъарей беркунца. Ил чербигьявкъел, ттужула дярх1ялли хьарбегьивца: — Ча гьадишшибай ила г1яжала рирсилжи?

— Дагник1ай!

— Чвакка зу цав, ччваккати!

Пявъибил барира сикала дярх1я ккушбяхъивца. Ц1илра гваза гьанбичивца. Ц1ил 6ик1улца ттужула дярх1ялци: — Дила цацара г1яжал рирси раривца. Бянда гьелттира чибагара. Дуц1бижив бярунни, гваза лут1ингу кебегъарей лямц1ттурагьабиривли беркунца. Ил чербигьявкъел, ттужула дярх1ялли хьарбегьивца: — Ча гьадишшибай ила г1яжала рирсилжи?

— Лут1ик1ай!

— Чвакка зу цав, ччваккати! Цаллара акквартигванти.

Даъдишшивцав эвла хъянила бирми. Чях1кадик1улца гьар ба ри марка. Сикала дярх1яра ттужула дярх1яра ккушдяхъивца. Ттужула дярх1ялжи гваза гьанцабичивца. Ил бик1улца: — Дахьабай нихьвала гваза берквана. На эв дач1ивца.

Дегурца ч1велра цанцилли, гвазила т1вахьва диг1янбишивци. Улбеталли, гзвазила т1вахьва бац1ли. Ттужула дярх1я шакбичивца ссикала дярх1ялла пишналжи: — Агь, гьел ил беркундикьал гьеж гваза. Гьана ду шакбичивда. И г1яйна ду акквал ттурабегурди, г1яйнара гваза берквана бярунди! Игван уртахъ дам на баживли акку! Гвазила уртахъдехь дам адиккар!

Ц1ил гьеттеннажин ттужула дярх1ялли сикала дярх1ялцциттар уртахъдехь деркьихивца.

Гьетин гьеттира белди, гьежин дура цегьивда.